Deputeti demokrat Flamur Hoxha ishte i ftuar në emisionin Debat në A2 CNN ku foli rreth skenarëve se si mund të bashkohet Partia Demokratike, pas mbledhjes së fundit të grupit ku një pjesë kërkonte heqje dorë nga Kuvendi i 30 prillit ndërsa pjesa tjetër kërkonte tërheqjen e ankimimeve për statutin e 11 dhjetorit.
Hoxha pasi prezantoi propozimin e tij për bashkimin e demokratëve, paraprakisht përsëriti kërkesën që Rithemelimi duhet të heqë dorë nga procesi zgjedhor që po organizon. Ai kërkoi një proces më gjithëpërfshirës që shkon në çdo qelizë të PD.
“Zgjidhja për bashkimin e PD është shumë e thjeshtë. Në mbledhjen e grupit deputetët u shprehën njëzëri se e vetmja rrugë është ndërprerja e proceseve në bazë nga grupi i Rithemelimit dhe bashkimi i partisë duke filluar nga strukturat drejtuese të gjithë degëve që ishin pjesë e 25 prillit. Me zgjedhjet që po avancojnë nga Rithemelimi pjesa më e madhe e deputetëve të grupit nuk është marrë. Nëse vendosim të largohemi nga interesat tona dhe shkojmë te qelizat e PD jam i sigurt që në një proces 3-4 muaj mund ta mbyllim këtë krizë. Kjo është e vetmja rrugë që e mban bashkë PD. Të gjithë deputetët e PD kishin të njëjtin shqetësim”, tha Hoxha.
Më tej, deputeti demokrat zbuloi se grupi i Rithemelimit nuk ka një projekt të qartë për zgjidhjen e ngërçit në parti dhe bashkimin e saj, por gjithçka ja ka lënë në dorë liderit historik, Sali Berisha.
“Më vjen keq që përmendim shumicë apo pakicë. Kjo është e turpshme për një që do të kontribuoj në Partinë Demokratike. Ata kanë qëndruar aty për 10 vite dhe ne kemi shtrirë dorën për të bashkuar partinë dhe jo për interesat tona. Më vjen keq që nuk u gjet konsensus. Grupi Themelimit nuk hedh në tavolinë një zgjidhje. Gjithçka aty vërtitet te Berisha dhe në këtë rast është vetë ai që e ka në dorë”, përfundoi Hoxha.
