Deputeti Tomor Alizoti thotë se Partia Demokratike është në një krizë parlamentare.
I ftuar në studion e Radar Informativ, Alizoti u shpreh se kur një grupim ka konflikt të brendshëm është në krizë dhe në këtë mënyrë kanë lënë edhe shqiptarët pa opozitë.
“Ne jemi në krizë parlamentare. Kjo është logjike, kur një grupim ka konflikt ai është në krizës. Ne dhe fatkeqësia është se kemi lënë dhe shqiptarët pa opozitë. Po asgjësojmë veten duke u marrë me veten. Struktura e partisë nuk pozicionohet dot me kundërshtarin. Kjo tregon që palët janë duke u vetëasgjësuar. Kur palët mendojnë se janë në të drejtë absolute kriza thellohet”, tha ai.
Duke komentuar ankimimin e Enkeljd Alibejat, Alizoti thekson se zgjidhja nuk vjen nga gjykatat, por duhet të jetë politike.
Sipas tij, Alibeaj duhet të kërkonte votëbesimin e deputetëve në pozicionin e tij si kryetar grupi.
“Unë mendoj që zgjidhja e një krize nuk zgjidhet në gjykatë. Nuk ka parti politike në Evropë që zgjidh gjërat e veta me gjykata. Edhe në mbledhje e kam thënë po shkoni në absurditet. Në një forcë politike vendos vota kush është shumica dhe pakica. Unë mendoj që edhe ajo që ka më pak ndjekës në PD duhet të unifikohet. Unë hodha një ide, po të isha në vendin e Alibeajt do e rivotoja veten”, u shpreh deputeti i PD.
