Nga Boldnews.al
DASH, DASH, DASH, shumë është përmendur nga aktorët politik, veçanërisht ato të mazhorancës, gati duke i mbushur mendjen vetes se duke tundur “zilen” e DASH-it, do të qëndrojnë gjatë e më gjatë në pushtet dhe nëpërmjet “brirëve” të tij, të shponin deri në vdekje opozitën. Është fjala për Departamentin Amerikan të Shtetit, i cili ditën e djeshme publikoi gjetjet përsa i përket Shqipërisë për vitin 2021.
Këmbora nuk po tundet më që nga dje as nga “analfabetët funksionalë” të qeverisjes, pasi gjetjet e raportit për vendin tonë janë më të zezat e mundëshme. Nëse do të merren me radhë, të paktën janë 15 pika të errëta.
“E drejta për tu gjykuar nga një gjykatë e pavarur dhe brenda një afati të arsyeshëm është shkelur”, thotë raporti.
Ata që e pësojnë janë pikërisht qytetarët që jo vetëm do futen në labirintet e një drejtësie të trembur, korruptuar dhe shantazhuar nga më të pushtetshmit, por edhe të vonuar. Postulati që qëndron si parullat e komunizmit se: “drejtësia e vonuar është drejtësi e mohuar” dikush duhet ta fshijë me bojë, sepse drejtësia është vërtetë e vonuar dhe drejtëpërdrejtë e mohuar.
Më tej mund të bërtasësh për padrejtësi, por edhe aty të mbyllet goja. Raporti thekson se liria e shprehjes është e kufizuar dhe e shkelur, po ashtu si pjesë e saj konstatohet edhe se e drejta për informim gjithashtu është e kufizuar.
Qeveria nuk mund të mbahet vetëm me shprehjen se kryelideri i saj është “dashnor i medias së lirë”, një tutor po, madje edhe dhunues, pasi në raport cilësohhen si problematikë kryesore liria e shprehjes dhe e drejta i informimit, ku shpesh media ose është e kapur ose e shantazhuar nga pushteti. Ata media që i kanë varur vetes medaljen se janë të “mëdha”, cilësohen si të kapura nga qeveria dhe vihen në dispozicion të propagandës së saj.
Për të dalë në thelbin qeverisjes, që ka të bëjë me votën e lirë dhe të ndershme, këtu qeverisja jo vetëm që ngel në “klasë” por duhej të përjashtohej përgjithnjë… “E drejta për të zgjedhur lirisht dhe midis alternativave politike cilësohet në raport si e shkkelur, gjithashtu shitblerja e votës në vitin 2021 shihet si fenomen masiv dhe se qeveria shfrytëzoi dhe mori avantazhe nga burimet publike”. Më qartë se kaq nuk mund të ishte raporti i Departamentit Amerikan të Shtetit mbi zgjedhjet, që mbajtën në pushtet sërish Ramën.
Duke mbetur specifikisht në oazin e qeverisjes, ka konstatime të rënda në raportin e DASH për çështjen e korrupsionit, në nivel qëndror dhe lokal. Në të cilësohet specifikisht se korrupsioni qeveritar është masiv, në të gjithë nivelet, po ashtu edhe ai bashkiak përkufizohet sërish si korrupsion masiv.
Po kush do ta luftojë gangrenën korrupsion? Drejtësia?! Vetë ajo është po aq e zezë sa të gjithë çështjet e tjera të trajtuara. Konstatimet janë thuajse të njëjta të katër viteve të fundit ku ndikimi i pushtetit mbi sistemin e ri të drejtësisë është cilësuar shqetësim serioz. Korrupsioni në sistemin e drejtësisë pas reformës përkufizohet si fenomen ekzistues. Ndërsa pika që përfshin ndikimin e qeverisë është edhe më e rëndë kur thuhet se “Emërimet në sistemin e drejtësisë janë të rrezikuara dhe të politizuara”.
Shtuar të gjithë këtyre gjetjeve në pikat e errëta përmendet çështja e pronësisë dhe mbuzimi mbi të. Mbrojtja dhe respektimi i së drejtës së pronës private cilësohet si i shkelur, ndërsa pasuria dhe prona publike e shpërdoruar nga pushteti.
Departamenti Amerikan i Shtetit në çdo raport të saj theksin e vendos në liritë dhe të drejtat e njeriut, diskrimimimin apo trajtimin e të dënuarve. Në të trija pikat konstatimet janë më të zeza se vetë e zeza. “Sistemi i burgjeve është i mbipopulluar dhe me mangësi të theksuara, dhuna në familje mbetet fenomen shqetësues dhe gjithashtu diskriminimi cilësohet si fenomen i shtuar.
Ky ishte vlerësimi i DASH-it për vitin 2021 , më zi se kaq nuk mund të ishte, pavarësisht se ata që pëleqejnë nuancat e pikturës imagjinare të qeverisjes do i japin tone rozë.
