1800 karta fermerësh janë gati për të përfituar karburantin falas për bujqësinë. Këtë njoftoi ministrja e Bujqësisë, Frida Krifca, pas mbledhjes së qeverisë. Sipas saj, këtë vit ka pasur rreth 50 mijë aplikime, ndërsa foli edhe për hapjen e tregjeve.
“Në Berlin isha në platformën e një thirrjeje që ministri gjerman kishte bërë për vendet e Ballkanit Perëndimor, mbi masat që janë marrë për hapjen e tregjeve. Unë shikoj një situatë shumë më të qetë edhe në tregje rajonale. Ne e kemi mbyllur skemën kombëtare më 30 mars dhe deri më sot kemi bërë gati 1800 karta të naftës për fermerët që janë gati. Ata marrin një mesazh nga e-albania dhe 1800 prej tyre, ne i kemi dhënë prioritet ato kulturave që mbillen tani. Po ecim shumë shpejt, sipas prioriteteve. Ne kemi pasur këtë vit rreth 50 mijë aplikime, një rekord. Premisa është pozitive, fermerët e besojnë skemën dhe kanë nevojë sigurisht dhe ne po bëjmë gjithçka të mundur që fondet të shkojnë sa më shpejt te ta”, tha ajo.
Ministrja njoftoi gjithashtu se po krijohet një regjistër për fermerët për të dalë në treg, i cili do të udhëhiqet nga Autoriteti Kombëtar i Veterinarisë dhe Bimëve.
“Akt për bujqësinë që ka të bëjë me futjen e librit për fermerin që kanë mundësi për të dalë në treg. Këtë e bëjmë në përputhje me praktikat për të gjurmuar sigurinë e produktit nga ferma në tavolinë. Ky proces do të udhëhiqet nga Autoriteti Kombëtar i Veterinarisë dhe bimëve që do të trajnojnë fermerët. Ky regjistër do të plotësohet nga fermerët nën mbikëqyrjen e tyre”, tha ajo.
