“Shqiptarët marrin makinën për të blerë bukë, marrin makinën kur dalin për të pirë kafe. Atëherë, nëse do marrësh makinën, do paguash! Njësoj siç paguan në Romë apo në Athinë!”. Kështu u shpreh kryebashkiaku Erion Veliaj, në përgjigje për të gjithë qytetarët e pakënaqur me tarifën e parkingjeve në Tiranë.
Për t’i bindur me fjalë të pakënaqurit Veliaj solli shembullin e të fortëve të lagjeve që zënë parkingje duke vendosur arka apo goma në rrugë.
“Për 4 mijë vende i paguanit lekët tek të fortët e lagjeve, pra lekët paguheshin për xhepat e vandalëve, që thonin ‘Që kur dola nga burgu, kam zënë këtë vendin këtu’ çfarë nuk kam dëgjuar”, tha Veliaj, i cili mendon se është më mirë që paratë të shkojnë në buxhetin e Bashkisë.
Veliaj i bëri këto deklarata në një aktivitet me punonjësit e “Tirana Parking”, ku kreu i Bashkisë tha se paratë që fitohen nga tarifat e parkingjeve do të përdoren për të blerë 2 milion pemët e “Pyllit orbital”, projekti i parashikuar në planin urbanistik.