Kolegji i Posaçëm i Apelimit la sot në fuqi vendimin e Komisionit të Pavarur të Kualifikimit për prokurorin Edmond Hyka.
Trupi gjykues që përbëhej nga kryesuese – Rezarta Schuetz, relator – Sokol Çomo, anëtarë – Albana Shtylla, Mimoza Tasi, Natasha Mulaj, vendosi të lërë në fuqi vendimin e Komisionit të Pavarur të Kualifikimit, që shkarkoi nga detyra prokurorin Hyka.
Trupa gjykuese konstatoi se prokurori Edmond Hyka nuk arriti të përmbushë detyrimin kushtetuese për të deklaruar saktësisht pasurinë dhe ligjshmërinë e pasurisë.
KPA mbylli hetimin pas seancës së zhvilluar më 24 Mars.
Edmond Hyka ka punuar si avokat nga viti 1998 deri në vitin 2005; kohë kur u emërua prokuror në Prokurorinë e Apelit të Durrësit. Në vitin 2006, Hyka u transferua në Prokurorinë e Apelit të Tiranës dhe vijoi ushtrimin e funksionit aty deri në shkarkimin nga vetingu.
