Zelanda e Re do të vendosë sanksione të reja kundër Rusisë në përgjigje të mizorive të kryera kundër civilëve, njoftoi qeveria.
”Një tarifë 35% do të vendoset për të gjitha importet nga Rusia dhe Zelanda e Re do të zgjasë ndalimet ekzistuese të eksportit për produktet industriale të lidhura ngushtë me industritë strategjike ruse”, theksoi ministrja e Jashtme Nanaia Mahuta.
”Sanksionet e reja kanë qenë përgjigja më e rëndësishme ekonomike e Zelandës së Re ndaj pushtimit rus deri më sot”, theksoi ajo.
“Imazhet dhe raportet që dalin për mizoritë e kryera kundër civilëve në Bucha dhe rajone të tjera të Ukrainës janë të neveritshme dhe të dënueshme dhe Zelanda e Re vazhdon t’i përgjigjet akteve të pakuptimta të agresionit të presidentit rus Vladimir Putin”, shtoi ajo.
Ministri i Tregtisë Damien O’Connor tha se Zelanda e Re do të ndalojë eksportin e produkteve të tilla si pajisjet dhe motorët e TIK, duke dërguar një mesazh të qartë se ”Zelanda e Re nuk do të financojë ose mbështesë makinën ruse të luftës”.
Masa vjen pas sanksioneve të tjera që synojnë Putinin, anëtarët e qeverisë së tij, oligarkët rusë, udhëheqësit e lartë ushtarakë rusë dhe individë.
