Tre shqiptarë janë në gjyq në Itali, pasi akuzohen për përdhunimin e një vajze italiane dy vite më parë, asokohe 27 vjeçe. Mediat italiane raportojnë se ndaj tyre është pranuar gjykimi i shkurtuar.
***
Supozohej të ishte një natë argëtuese në pub me miqtë. Por, mbrëmja e 2 tetorit 2020 u shndërrua në një makth për një 27-vjeçare italiane. Sipas Prokurorisë së Romës, vajza italiane u përdhunua në një “Bad and Breakfast” në zonën e Borghesiana (Romë) nga dy shqiptarë që në atë kohë ishin 28 dhe 23 vjeç, me mbështetjen e një tjetër shqiptari të tretë të akuzuar për “frikësimin” e viktimës duke e informuar për faktin se “njëri nga dy bashkatdhetarët” ishte i arratisur. Në këtë mënyrë “ka lehtësuar – thuhet në akuzë – kryerjen e veprës penale të dhunës seksuale në grup” nga të pandehurit e tjerë. Tashmë të tre do të gjykohen me proces të shkurtuar nga gjykata e Romës.
Carmela ishte ftuar nga një mike e saj dhe i dashuri i kësaj të fundit (tani i akuzuar si personi që e frikësoi) në një pub në Via Borghesiana. Aty, ajo u takua me shqiptarët të cilët më pas e përdhunuan. Të dy akuzohen edhe për rrëmbim, pasi sipas prokurorisë, “i kanë hequr lirinë personale”: fillimisht i kishin vjedhur çelësat e makinës, pastaj pasi e morën në mjet, e çuan në një hotel tip “Bad and Breakfast”. Aty e mbyllën në një dhomë gjumi dhe e përdhunuan. Dyshohet se Carmela ka pësuar katër marrëdhënie të ndryshme seksuale, ndërsa njëri prej dy shqiptarëve ka filmuar përdhunimin me celularin e tij.
Hetimet nga Karabinierët bënë të mundur identifikimin e autorëve të dyshuar, për të cilët prokurori kishte kërkuar masën e sigurimit arrest me burg, e cila më pas u refuzua nga gjyqtari i hetimeve paraprake. Në seancat e ardhshme të gjykimit të themelit pritet të hidhet më shumë dritë rreth çështjes.
