Ekspertët e ekonomisë, kanë dalë kundër, masës së qeverisë për të rritur çmimin e energjisë elektrike të familjeve më të ardhura të larta, duke e kategorizuar shoqërinë në të pasur dhe të varfër. Gjatë një interviste për SYRI TV, ekonomisti Zef Preçi, tha se nisma të tilla janë tipike e regjimeve totalitare, ndërsa theksoi se qeveria duhet të ndihmojë shtresat në nevojë. Ai sugjeroi që të pezullohen apo anulohen koncesionet, për t’i ardhur në ndihmë krizës.
Edhe pse propagandoi në të gjitha daljet publike se qeveria do të mbulojë koston shtesë të energjisë elektrike për familjet shqiptare, në seancën e fundit të parlamentit, kreu i qeverisë Edi Rama paralajmëroi rritje të çmimit për familjet me të ardhura të larta, duke bërë edhe ndarjen e shoqërisë në të pasur dhe të varfër.
Kjo masë e qeverisë për ekspertët e ekonomisë, është tipike e regjimeve totalitore. Ekonomisti Zef Preçi tha për SYRI TV, se kategorizimi i familjeve në të pasur dhe të varfër nuk aplikohet në asnjë shtet të botës. Ai sugjeroi që në vend të saj, të ndihmohen financiarisht shtresat vulnerable.
Preçi u shpreh kundër krijimit të bordit të administrimit, për vendosjen e çmimeve të karburanteve dhe produkteve të shportës nga shteti, duke thënë se një masë e tillë sjellë efekte të rrezikshme në ekonominë e tregut. Sipas Preçit, shtetit duhet të nxisë konkurrencën, jo të fiksojë çmime.
Po kaq skeptik, Preçi u shpreh edhe për paketën sociale të qeverisë, që sipas tij është e pamjaftueshme. Ai tha se për ti ardhur në ndihmë krizës, duhet të pezullohen apo anulohen koncesionet e panevojshme.
