Paçka kryeminsitri Rama shpalli nga Stambolli se aeroporti i ri do të ndërtohet në qytetin e Vlorës, Ministria e Transporteve kërkon studim fizibiliteti për një aeroport në jug të vendit, edhe pse pa përcaktuar qytetin.
Në faqen e Agjencisë së Prokurimeve Publike ministria shpalli tenderin për studimin e fizibilitetit me fond limit 25 milionë lekë ose rreth 200 mijë dollarë pa përfshirë Tatimin mbi Vlerën e Shtuar.
Sipas njoftimit zyrtar kompanitë e interesuara kanë kohë deri në datën 13 shkurt që të dorëzojnë kërkesat për shprehjen e interesit.
Sqarohet se studimi i fizibilitetit do të përcaktojë kapacitetin e aeroportit, modelin e tij ekonomik, por mbi të gjitha edhe vendin më të përshtatshëm për ndërtimin e tij.
Por shpallja e tenderit vjen pak ditë pasi kryeministri tha nga Stambolli se aeroporti do të ndërtohet në Vlorë.
“Drekë në Stamboll me Presidentin Erdogan për projektin e aeroportit të Vlorës, linjën ajrore shqiptare e investime të tjera strategjike,” shkroi Rama para disa ditësh në profilin e tij në Twitter.
