Një sherr publik me akuza të forta për gjobëvënie ka ndodhur mes televizionit Top Channel dhe ish autorit të programit Top Story, Endrit Habilaj.
E gjitha erdhi si pasojë e ndryshimit të emrit të programit, në Inside Story, ndërkohë që Top Story do ti rikthehet Sokol Ballës. Televizioni hodhi akuza ndaj Habilajt, se ka përdorur programin për gjoba.
Gazetari Habilaj ka reaguar edhe njëherë lidhur me programin që ka drejtuar prej katër vitesh, duke renditur dokumentarët e realizuar prej tij dhe një grupi gazetarësh në Top Channel.
Por në një fragment në reagimin e tij, Habilaj shkruan “edhe për Nikoll Lesin, i cili është indinjuar se kush i merr fondet e Bashkimit Europian, kemi bërë një dokumentar, për 30 vjetorin e gazetës më të rëndësishme në vend, Koha Jonë”.
Kjo ka sjellë reagimin e Nikoll Lesit, përmes gazetës së tij.
“Na duhet ti kujtojmë gazetarit investigues, Habilaj, se nuk e ke lexuar aspak mirë shkrimin e “KOHA JONE” në lidhje me fondet e BE për disa media shqiptare. E para nuk kishte të bënte fare me Ju, pasi ju bëfshin mirë eurot që morët, sepse keni bërë punë të mirë. E dyta, shkrimi shigjetonte disa portale dhe media që marrin fonde nga BE pa asnjë kriteri mediatik, e që janë afër qeverisë.
Ironitë me “KOHA JONE” janë jo korrekte dhe nëse griceni me tepër nuk dilni mirë, pasi edhe ne jemi media investigative dhe shumë më e vjetër se emisioni juaj apo të krejt emisioneve e mediave shqiptare!”, shkruan gazeta me botues Nikoll Lesin.
