Komiteti Zgjedhor Hungarez (NVB) tha të dielën se nuk kishte juridiksion në Rumani, kështu që nuk mund të hetonte rastin e votave hungareze me postë të gjetura në një vendgrumbullim mbeturinash pranë Marosvásárhely (Târgu Mureş), në Rumaninë perëndimore.
Ligjvënësi hungarez Ákos Hadházy iu drejtua Komitetit duke thënë se fletët e djegura zgjedhore të gjetura në vendgrumbullimin e mbeturinave ishin fletëvotime postare për zgjedhjet hungareze. Në seancën e tij përpara komisionit, Hadházy i bëri thirrje NVB-së të anulojë të gjitha votat e dërguara me postë dhe të përsërisë zgjedhjet.
“Nëse NVB nuk mund të sigurojë sigurinë e zgjedhjeve përtej kufijve, procedura duhet të përsëritet dhe komiteti duhet të japë dorëheqjen, tha Hadházy.
NVB hodhi poshtë kundërshtimin e Hadházy me 9 vota pro dhe 4 kundër. Sipas vendimit, NVB nuk ka juridiksion në Rumani dhe nuk mund të kryejë hetime atje.
Zyra Kombëtare e Zgjedhjeve (NVI) paraqiti një ankesë në polici pasi u publikuan raportet mbi rastin.
Kreu i NVI, Attila Nagy tha në takim se NVI ka marrë 225,000 vota me postë deri më tani.
Duke komentuar vendimin e NVB-së, Richárd Barabás, zëdhënës i partisë opozitare Párbeszéd, tha: “kush tjetër ka juridiksion mbi zgjedhjet në Hungari, të cilat po organizohen me përfshirjen e votave me postë?”.
