Kryebashkiaku i Tiranës, Erion Veliaj, ka dhënë preferencën e tij lidhur me Presidentin e ri të vendit. Partia Socialiste, ku Veliaj është anëtar i Kryesisë, ka nisur procesin e negociimit për zgjedhjen e Kreut të ri të Shtetit, madje duke caktuar edhe emrat e 3 negociatorëve që do të hyjnë në bisedime me deputetë dhe grupet parlamentare.
Ndërkohë Veliaj tha se Shqipëria ka hyrë në fazën kur duhet të zgjedhë një President të ri, i cili sipas tij duhet të jetë në shërbim të njerëzve dhe që i do të mirën vendit.
“Shumë shpejt do të na duhet të mendojmë për Presidentin e ardhshëm të Shqipërisë. Kam dëgjuar debatet që bëhen sot nëpër studiot televizive, apo qoftë edhe brenda partive tona, për të gjetur identikitin e Presidentit të ardhshëm. Njëri thotë duhet të jetë kështu, tjetri thotë duhet të jetë ashtu, të ketë këtë moshë apo atë moshë, por në fund të gjithë kanë një të përbashkët: kush i do të mirën këtij vendi dhe do të sugjerojë identikitin e Presidentit të ardhshëm, thotë: ai duhet të jetë si Presidenti Moisiu sepse besoj se ka një konsensus të jashtëzakonshëm, përtej bindjeve politike, përtej të majtës dhe së djathtës, përtej myslimanëve dhe të krishterëve, përtej veriut dhe jugut, se ai është identikiti i Presidentit që na duhet. Një njeri me rrënjë, një njeri me bosht, që është në shërbim të publikut”.
Alfred Moisiu u zgjodh President në vitin 2002, pas paktit të arritur mes dy ish-Kryeministrave Fatos Nano dhe Sali Berisha. Në atë kohë Kreu i Shtetit u propozua nga PD.
