Partia Demokratike vijon të shfaqet me dy qëndrime për shumv çështje thelbësore. E ndërsa nga Shkodra, ish-Kryeministri Sali Berisha deklaroi se asnjë deputet i PD nuk do të votojë kandidat të propozuar nga Edi Rama për postin e Kreut të Shtetit, duket se Enkelejd Alibeaj ndan një tjetër qëndrim.
Me cilësinë e kreut të grupit parlamentar të PD, Alibeaj shprehet se Berisha nuk është pjesë e grupit dhe në kushte të tilla ai s´mund të flasë për qëndrimet e grupit.
Në reagimin e tij në rrjetet sociale, Alibeaj akuzon Berishën se me ndryshimet Kushtetuese të 2008-ës, i mundëson sot Edi Ramës që të zgjedhë Presidentin e ri vetëm me votat e mazhorancës.
“Grupi parlamentar i PD nuk ka nisur ende asnjë diskutim për sa i përket çështjes së presidentit të Republikës. Në ditët në vijim, për shkak se mund të jetë në axhendën parlamentare, do të diskutohet me anëtarët e grupit për këtë çështje.
Qëndrimet personale të askujt, aq më tepër të atyre që nuk janë pjesë e grupit parlamentar të PD nuk kanë kurrëfarë lidhje me qendrimin dhe vendimarrjen e grupit parlamentar.
Ata që flasin sot për këtë çështje, në fakt, me ndryshimet kushtetuese të 2008, ia kanë mundësuar Edi Ramës ta zgjedhë, thjesht me vetëm votat e tij presidentin e vendit”, shkruan Alibeaj.
Reagimi i kreut të Grupit Parlamentar të PD vjen në një kohë kur nga ish-Kryeministri Sali Berisha janv artikuluar akuza në drejtim të Kryeministrit Edi Rama se po tenton të blejë deputetë të opozitës për të siguruar zgjedhjen e Presidentit të ri të vendit, ndërsa e ka paralajmëruar se do të dështojë në këtë tentativë. Gjithashtu Berisha është treguar i prerë lidhur me mos mbështetjen e emrave që do të paraqiten nga Edi Rama si kandidatë, duke u shprehur se mbështetja ndaj tyre është njëlloj sikur për Kryetar Shteti të votohet shëmbëlltyra e Kryeministrit.
