Edit Harxhi e ka konsideruar një shaka mundësinë që Lulzim Basha të kandidojë për President.
“Komisioni i rithemelimit nuk ka diskutuar asnjë kadidaturë dhe aq më tepër emrin e z. Basha, nuk mendoj se është objekt diskutimi për komisionin. Ne kemi objektiv datën 30 prill ku do të dalë kryesia e re e PD dhe gjithë forumet e tjera.Sa i përket z. Basha president nuk do doja të merresha me shaka të tilla”, tha Harxhi nga Korça.
Sa i takon organizimit të brendshëm, e deleguara në Korçë për riorganizimin e PD-së, tha se deri tani nuk ka asnjë emër për kandidat për kreun e degës.
“Deri tani jemi në proçes riorganizimi dhe nuk kemi asnjë emër kandidati për kadidat për kryetar të PD Korçë, zyrtarisht nuk ka asnjë kadidaturë nga asnjë. Kudërshtarët duhet të dinë që PD po kthehet fuqishëm në Korçë. PD po bashkohet dhe kjo falë frymës së foltores, e cila i riktheu shqiptarëve shpresën, të gjithë mund të na bashkohen edhe ata që kanë mbështetur Bashën. Pra kush dëshiron mund të jetë pjesë e proçesit”.
Harxhi shtoi se po punojnë për riorganizimin e PD duke përfshirë dhe bashkuar rreth saj njerëzit e vlerave.
“Me angazhimin e anëtarëve në Korçë dhe bashkimi i tyre pa kushte do na çojë sigurisht në fitore. Ky riorganizimi i prin primareve që do të mbahen më pas për kandidatët për Bashkinë e Korçës por edhe zgjedhjet e ardhshme parlamentare”, tha ajo.
