Një 60-veçar është arrestuar nga policia në aksin Kakavijë-Gjirokastër, pasi është kapur duke transportuar refugjatë me makinë.
I.H., 60 vjeç, banues në Lushnjë, u vu në pranga.
Aksioni “ROAD GUARD 11” u krye nga Specialistët e Seksionit për Hetimin e Trafiqeve të Paligjshme në DVP Gjirokastër, në bashkëpunim me Policinë Rrugore dhe Komisariatin e Policisë Gjirokastër.
“Në aksin rrugor Kakavije-Gjirokastër, në vendin e quajtur ‘Kordhocë’, shërbimet e Policisë Rrugore i kanë bërë shenjë ndalimi automjetit me drejtues shtetasin I.H., i cili nuk i është bindur urdhrit për të ndaluar. Menjëherë shërbimet e Policisë Rrugore janë vënë në ndjekje të mjetit dhe në vendin e quajtur ‘Ura e Lumit’, Gjirokastër, kanë kapur shtetasin I.H., i cili ishte duke transportuar 6 emigrantë të paligjshëm nga vendet MENA, kundrejt fitimit”, njoftoi policia.
Në cilësinë e provës materiale u sekuestruan një automjet dhe një aparat celular.
Policia ka publikuar edhe pamje nga aksioni.
