Ambasadorja e SHBA në Tiranë, Yuri Kim, përmes një postimi në rrjetet sociale shprehet se SHBA kanë mirëpritur atë që cilësuan “raport të paanshëm” të Agjencisë së Kadastrës në lidhje me mangësitë dhe krimet e mundshme në Durrës.
Kim shprehet se tashmë priten hapa konkretë për të vënë përgjegjësit para drejtësisë, “për të rritur transparencën dhe për të mbyllur mundësitë për korrupsion kur bëhet fjalë për regjistrimin e pronave në Durrës dhe gjetkë në Shqipëri.”
Sipas asaj që shprehet kryediplomatja amerikane, hapat e tillë do të tërheqin më shumë investime, përfshirë edhe nga SHBA.
“Po ashtu, hapa të tillë e bëjnë të qartë se Shqipëria është gati për t’u anëtarësuar në BE”, shkruan Kim.
1/2 We welcome the candid report of the Cadaster Agency regarding deficiencies & potential crimes in Durres. We look forward to concrete steps to hold accountable those responsible, increase transparency & shut down opportunities for corruption…
— Ambassador Yuri Kim (@USAmbAlbania) March 31, 2022
Postimi i plotë
“Mirëpresim raportin e sinqertë të Agjencisë së Kadastrës në lidhje me mangësitë dhe krimet e mundshme në Durrës. Ne presim hapa konkretë për përgjegjësit, për të rritur transparencën dhe për të mbyllur mundësitë për korrupsion kur bëhet fjalë për regjistrimin e pronave në Durrës dhe në Shqipëri.
Hapat e tillë do të tërheqin më shumë investime, përfshirë edhe nga SHBA. Ata gjithashtu do të bëjnë të qartë se Shqipëria është gati për t’u anëtarësuar në BE”, shkruan Kim.
Akuzat
Një raport i detajuar ka nxjerrë një seri shkeljesh dhe abuzimesh nga Kadastra e Durrësit veçanërisht në zonat bregdetare si Plazh, Spitallë, Lalëz, Draç, Rodon, etj.
Referuar raportit 600 faqesh, lidhur me Kadastrën e Durrësit, vetëm 15 % e dosjeve janë pa probleme, ndërsa pjesa tjetër e regjistrave janë me faqe që mungojnë, të grisura madje edhe shumë të dubluara që tregojnë se për një pasuri janë ndjekur dy rrugë të ndryshme legalizimi apo kthimi te pronari duke sjellë abuzime shumë të mëdha.
“Situata që paraqet Raporti e tejkalon çfarëdolloj imagjinate. Mjafton të të them vetëm disa shifra:
Nga 1063 regjistra, vetëm 152 rezultojnë pa dëmtime.
Të tjerët, (908 regjistra) rezultojnë të dëmtuar me grisje, heqje fletësh, ndërrime faqesh, etj.
– 730 faqe mungojnë tërësisht (janë grisur dhe nuk janë zëvendësuar fare);
– 243 faqe të zëvendësuara (pra kanë hequr faqen e vërtetë dhe e kanë zëvendësuar me një tjetër);
– 569 faqe të dubluara (pra e njëjta pasuri ekziston 2 herë. Këtë e bënin për të punuar me dy linja për të njëjtën pasuri);
– 25 faqe të grisura (pra është grisur faqja, por ka mbetur pjesa e qepjes);
-1548 faqe bosh (faqe që liheshin bosh herë pas here, me qëllim për t’u përdorur me data te mëparshme).
Sa më sipër janë dëmtimet që duken, pasi ka edhe pafund ndërrime fletësh që janë bërë me art dhe nuk kuptohet që janë zëvendësuar. Kjo sepse regjistrat janë të shqepur dhe mund të heqësh e të shtosh pa hesap. Regjistrat e dëmtuar më shumë, natyrisht që janë ata që kanë të bëjnë me pasuritë përgjatë zonës bregdetare: Plazh, Spitallë, Lalëz, Draç, Rodon, etj”, tha Artan Lame, një ditë më parë.
