Kjo e Enjte shënon ditën e 36-të të luftës në Ukrainë.
Më poshtë, ju sjellim disa nga zhvillimet kryesore të ditës:
Kreu i agjencisë britanike të spiunazhit, Jeremy Fleming tha se këshilltarët e Vladimir Putinit janë të frikësuar t’ia thonë të vërtetën për përparimin e pushtimit të tij në Ukrainë.
Ministria ruse e Mbrojtjes ka njoftuar për një armëpushim në qytetin e rrethuar të Mariupolit në Ukrainë, duke filluar nga mëngjesi i së Enjtes.
Ukraina njoftoi se ka miliona tonë rezerva të grurit dhe misrit.
Presidenti i Ukrainës, Volodymyr Zelensky, tha se vendi i tij po përgatitet për një ofensivë të re të ushtrisë ruse, në pjesën lindore.
Inteligjenca ushtarake britanike tha se bombardime dhe sulmet me raketa ruse kanë vazhduar në Çernihiv, pavarësisht deklaratave ruse për reduktimin e aktivitetit ushtarak rreth zonës.
Një kolonë autobusësh ukrainas u nis të enjten për në qytetin e Mariupolit, për të ofruar furnizime humanitare dhe për të nxjerrë civilët e bllokuar.
Ukrainasit në SHBA po përgatiten për të ndihmuar 100,000 refugjatë ukrainas.
Separatistët pro-rusë në Ukrainën lindore kanë thënë se ata kontrollojnë pothuajse të gjithë rajonin e Luhanskut dhe më shumë se gjysmën e rajonit të Donjeckut.
Presidenti ukrainas, Volodymyr Zelensky, i kërkoi të enjten parlamentit holandez armë, ndihmë për rindërtim dhe ndalimin e çdo biznesi me Rusinë, si kundërpërgjigje të pushtimit të vendit të tij.
Qeveria britanike tha të enjten se ka shtuar edhe 14 pika në listën e saj të sanksioneve kundër Rusisë, pas pushtimit të Ukrainës.
Autoritetet ukrainase kanë njoftuar se disa civilë janë plagosur të enjten nga granatimet në rajonin e Donjeckut.
Zëdhënësi i Kremlinit, Dmitry Peskov, tha se as Departamenti amerikan i Shtetit dhe as Pentagoni nuk kanë informacione të vërteta për atë që po ndodh në luftën ndërmjet Rusisë dhe Ukrainës.
NATO tha Rusia nuk po zvogëlohet, por po ripozicionohet.
Presidenti i Rusisë, Vladimir Putin, ka njoftuar se ka firmosur dekretin që detyron klientët e huaj që ta blejnë gazin me rubla, duke nisur që nesër.
