Në Kuvend kishte përplasja të forta në lidhje me arrestimin e Alqi Bllakos për korrupsion.
Ministri i Drejtësisë Ulsi Manja tha se maxhoranca ka pasur gjithmonë një qëndrim të qartë sa iu përket të gjithë personave që janë të implikuar.
Manja u shpreh se maxhoranca i ka hapur rrugën drejtësisë dhe nuk ka mbrojtur askënd përballë ligjit.
Ai tha se deklarata të tilla nuk duhet të vijnë nga PD, që sipas tij, iu detyrohet katër familjeve për viktimat e 21 janarit.
Kurse deputeti Dashnor Sula deklaroi se Rilindja do të çonte përpara drejtësisë të korruptuarit, por se kjo gjë nuk ka ndodhur.
Manja: Sot i kemi hapur rrugë drejtësisë. Për ne drejtësia ka qenë vija e kuqe në raport me qytetarët. Turpin mbajeni në atë krahun andej. Sot e kësaj dite s’i keni kërkuar falje dhe ndjesë 4 familje që po rrisin viktima për atë pushtet që kishit dje. Ju s’keni përgjegjësi për shqiptarët, ju kanë votuar për logje në Kuvend. Ne jemi një qeveri e përgjegjshme, që kemi qenë në çdo moment në krah të qytetarëve, me aq mundësi sa kemi. Kemi ditur t’i menaxhojmë në funksion të halleve të tyre. Do t’ju lutesha që fjalën turp e moral, nuk duhet të na e përmendni. Ka disa nga ata në këtë sallë që kanë përlyer duart me gjakun e shqiptarëve.
Sula: Unë gjatë fjalimit tim nuk ndava se cili është ministri që ka përfituar. Thashë qeveri. Ka ministra të korruptuar pranë qeverisë, siç është e njëjta gjë edhe te ne. Edhe sot, nuk janë të gjithë korruptues. Nuk kemi pse të përlyhemi të gjithë për gjendjen që jemi. A kemi mundësi që personat që abuzojnë të shkojnë përpara drejtësisë. Për atë që tha ministri, që duhet të kemi turp. Po, e them hapur, kam qenë një nga njerëzit që në 2013 kam besuar te Rilindja dhe kisha shpresë që korrupsionit që kishim do i jepnit fund. Por ndodhi që ju i mbrojtët ato, ky ishte pakti i politikës. Kjo nuk është faji i opozitës, por i juaji.
