Kryeministri Edi Rama e konsideroi si përgjegjësi personale për cilindo që shkel ligjin, duke shmangur kështu çdo përgjegjësi politike lidhur me aferën e inceneratorëve që po hetohet nga SPAK.
Pas mbledhjes së Kryesisë së PS, Rama u pyet nëse ka pasur komunikim me Alqi Bllakon pas kërkesës së SPAK për arrestimin e tij, ndërsa Kryeministri iu shmang përgjigjes.
“Këto nuk kanë lidhje me programin apo rezultatet e qeverisë por me një përgjegjësi që në rast se dejtësia e nxjerr në pah, do jemi të kënaqur që jepen mësime që kush përdor detyrën për përfitim personale përfundon atje ku nuk ja merrte mendje. Ne nuk jemi vend me mentalitet komunist, për ti vënë pikën qëndrimet e mia nuk lidhen me personat por me një process që kemi qëllim ta shtyjmë përpara. Ju shkoni në sheshe, në gjykata…
Deputetët janë të popullit, individët janë të vetes dhe përpara ligjit nuk ka deputet, nuk ka ministër apo politikanë, apo të fortë, janë të gjithë të barabartë. Habitem që ka akoma nevojë për të tilla pikëpyetje ndërkohë që gjithçka që po ndodh nuk është gjë tjetër veçse përgjigja për ata që nuk besonin se në Shqipëri do të bëhej një reformë në drejtësi”, tha Rama.
