Floriana Garo iu përgjigj një deklarate të Gazment Bardhit, i cili e konsideron si përdhosje të çdo deputeti pjesëmarrjen e Sali Berishës në mbledhjen e Grupit Parlamentar të PD.
Përmes një deklarate, Garo në emër të PD, shprehet se qëndrimi dhe vullneti i grupit parlamentar u injorua dhe u përdhos ditën kur për pezullimin antistatutor të Sali Berishes nga grupi parlamentar, vendosi një individ duke mos pyetur fare as grupin parlamentar dhe asnjë institucion tjetër të Partise Demokratike!
“Mandati i çdo deputeti të PD është marrë në dt 25 Prill nga votuesit e Partisë Demokratike. Besimi i demokratëve në mandatin e Sali Berishës u konfirmua në 11 Dhjetor, 18 Dhjetor dhe më pas në 6 Mars.
Ata që morën vendime duke shkelur statutin, pa pyetur Këshillin Kombëtar e Grupin Parlamentar dhe kthyen PD për herë të parë në histori në forcë të tretë, sot nuk duhet të japin leksione dinjiteti, por duhet të lexojnë vullnetin e demokratëve, të shprehur qartë me votë si e vetmja rrugë për të ecur përpara! Në demokraci respektohet mendimi i gjithsecilit por vendos shumica.
Koha ku vota e demokratëve zëvendësohej me urdhëra dhe vullnete të liga ka marrë fund”, shprehet Garo.
