Pas një shkrese të depozituar në Kuvend nga deputeti Alqi Bllako, i cili shprehej se dorëzonte mandatin e deputetit, Kuvendi ka njoftuar se anullonte mbledhjen e thirrur të Këshillit për Rregulloren, Mandatet dhe Imunitetet, ku do të shqyrtohej kërkesa e SPAK.
“Në mbështetje të Urdhërit nr. 24, datë 30.03.2022, të Kryetares së Kuvendit, znj. Lindita Nikolla “Për anullimin e mbledhjes së Këshillit për Rregulloren, Mandatet dhe Imunitetin”, mbledhja e Këshillit nuk do të zhvillohet.
Deputeti Alqi Bllako ka depozituar në Kuvend deklaratën për heqjen dore nga madadti i deputetit me vullnet të lirë dhe për rrjedhojë Kuvendi nuk mund të vazhdojë procedurat për shqyrtimin e kërkesës së Prokurorisë së Posaçme Kundër Korrupsionit dhe Krimit të Organizuar për dhënien e autorizimit për arrestimin e deputetit Alqi Bllako”, thuhet në një njoftim të Kuvendit.
Por, deputetët e PD-së, anëtarë të Këshillit për Rregulloren, përmes një shkrese kërkojnë zhvillimin e mbledhjes. Sipas tyre, mbledhja është anulluar që provat e SPAK të mos publikohen.
Përgjatë ditës së sotme është aluduar se do të bllokohej bërja publike e provave të SPAK lidhur me kërkesën që ata kanë paraqitur në Kuvend për arrestimin e deputetit Alqi Bllako, në kuadrin e hetimeve për aferën e inceneratorëve.
Një nga rrugët që do të bllokonte publikimin e provave ishte pikërisht dorëheqja nga mandati i deputetit nga ana e Bllakos, duke shmangur në këtë mënyrë zhvillimin e mbledhjes së Këshillit për Rregulloren, Mandatet dhe Imunitetet.
Në këtë mënyrë provat jo vetëm nuk bëhen publike, por nuk i vihen në dispozicion edhe deputetëve, anëtarë të këshillit, të paktën deri në një moment të dytë.
