“Mendoni se kam mbaruar. Vetëm sa po bëj nxehje”. Zlatan Ibrahimovic ka lëshuar sfidën e tij nëpërmjet rrjeteve sociale.
Suedezi, pasi ka fituar kampionatin në Ligue 1 me PSG, është në pritje të sfidës me Manchester City në çerekfinalet e Champions league. Dhe në horizont është edhe Europiani në Francës me Suedinë e tij. Ndërkohë, e ardhmja mbetet e pasigurt.
Nëse Berlusconi ka deklaruar se është e pamundur që ai të kthehet te Milan “sepse do të marrë oferta që ne nuk mund t’i barazojmë”, pretendentët për sulmuesin nuk mungojnë: Kina, Shtetet e Bashkuara të Amerikë dhe United me Bayern, në Europë. Dhe lajmi i orës së fundit është se në garën për të siguruar shërbimet e suedezit është futur edhe Napoli.
De Laurentiis e ka seriozisht dhe disa ditë më parë “axurrët” kanë bërë lëvizjen e tyre, duke i propozuar sulmuesit 8 milionë euro në sezon për dy vitet e ardhshme. Shumë kjo që mund të shkojë në 10 milionë euro me përfshirjen e një bonusi në rast se fitohet titulli. Ibra, i cili është një specialist në fitimin e kampionateve, është njeriu i duhur për të synuar suksesin në Serinë A dhe për të pasur më shumë personalitet në Europë. Kjo është ajo që do dhe Zlatan, të jetë përsëri protagonist në Champions League, turneu i kampionëve.
Për momentin kemi të bëjmë vetëm me disa sondazhe fillestare, por asgjë nuk mund të përjashtohet. Në rast se Higuain vendos të largohet, Ibra do të ishte zëvendësuesi i duhur.
