Katër të rinj kanë humbur jetën një aksident rrugor të ndodhur gjatë orëve të para të së dielës në komunën italiane Guidonia Montecelio.
Sipas mediave italiane viktimat po udhëtonin në bordin e një “Mini Cooper” që përfundoi jashtë rruge rreth orës 3:30 të mëngjesit të sotëm në rrugën Tiburtina, ku dhe u përplas me muret e një restoranti.
Një automjet ku udhëtonin 4 të rinj ka dalë nga rruga dhe për pasojë është përmbysur duke shkaktuar vdekjen e 2 vajzave shqiptare dhe 2 italianë.
Mediat italiane shkruajnë se vajzat shqiptare janë identifikuar si Xhesika G. 19 vjeçe dhe Ambra S. 18 vjeçe.
Dy vajzat gjendeshin në sediljen e pasme të mjetit. Ndërkohë, janë identifikuar edhe dy të rinjtë italianë, Federico B. 18 vjeç dhe Riccardo M. 19 vjeç.
Mësohet se mjeti ka dalë nga rruga ndoshta për shkak të shpejtësisë.
Makina me të cilën udhëtonin të rinjtë u shkatërrua nga përplasja.
Raportohet se në vendngjarje mbërritën forcat zjarrfikëse, të cilave iu deshën më shumë se 3 orë për të nxjerrë dy trupa të ngecur në mjet.
Sakaq mësohet se dy viktima të tjera dolën nga makina për shkak të përplasjes. Ata u gjetën 30 metra nga vendi i përplasjes.
“Ishte e tmerrshme, nuk mundëm të bënim asgjë”, thanë dëshmitarët.
Trupat u transportuan në morgun e Veranos.
