Dy persona kanë rënë në prangat e policisë së Lezhës, pasi akuzohen se kërcënonin një person se do t’i vrisnin djalin nëse nuk u jepte plot 25 mijë euro.
Të arrestuarit janë Dodë Gjoka, 37 vjeç dhe Mark Çuku, 49 vjeç. Sipas policisë këta persona, për një kohë të gjatë kërcënonin shtetasin me inicialet V.P. biznesmen, se do t’i vrisnin djalin nëse nuk u jepte 25 mijë euro.
Por V.P. njoftoi Policinë për rastin dhe inskenoi takimin me dy kërcënuesit të cilëve u tha se do t’ua jepte paratë. Mësohet se kur Gjoka dhe Çuku shkuan të merrnin 25 mijë eurot, ata u përballën me policinë dhe u prangosën në vend.
