Gazetari Marin Mema ka provokuar shtetin grek përmes një reportazhi, që tregon historinë e vërtete sesi u krijua shteti fqinj, roli i shqiptarëve, kryengritjet e mëdha, dokumentet e fshehta. Mema e ka të ndaluar të hyjë në Greqi.
Në gusht 2012 policia greke ndaloi në pikën e kufirit të saj në Qafë Botë gazetarin e televizionit Top Channel, Marin Mema, duke e cilësuar atë si element që përbën rrezik kombëtar për shtetin grek. Bëhet e ditur se gazetari ka qenë duke udhëtuar me familjen e tij për të kaluar pushimet në shtetin fqinj në momentin kur është ndaluar nga pala greke, duke i komunikuar se emri i tij ndodhej në listën e personave që përbenin rrezik kombëtar për këtë shtet.
Gazetarit Mema iu njoftua gjithashtu se i është hequr përjetësisht e drejta për të kaluar kufirin shqiptarogrek. Shkaqet për këtë masë mësohet të jenë dy reportazhet që Mema ka realizuar në tokën greke. I pari kishte të bënte me trajtimin e problematikës në krahinën e Çamërisë dhe tjetri paraqiste fshatin e lindjes të patriotit shqiptar Papa Kristo Negovani.
Edhe gjatë realizimit të reportazheve autoritetet greke kanë ndaluar grupin e xhirimit të TopChannel.
Gazetari kishte telefonuar pranë Ministrisë së Jashtme të vendit tonë për të kërkuar ndihmë, por i është komunikuar se nuk kanë fuqi për të ndikuar në një vendim të tillë të autoriteteve greke.
Në këtë video mund të ndiqni të plotë dokumentarin e gazetarit Marin Mema, “Shqiptarët që krijuan Greqinë”.
