Ish-kryeministri Sali Berisha deklaroi në një konferencë për mediat nga selia e PD se Komisioni i Rithemelimit është i përkohshëm.
Berisha tha se kjo parti është në betejë me Edi Ramën pasi vendi po shkatërrohet çdo ditë.
Ai tha se Partia Demokratike do të udhëheqë protestat qytetare për rritjen e çmimeve.
“U bë një valë protestash. Populli pret valën tjetër të protestave dhe do udhëhiqet nga PD. Le të thotë ai çfarë të dojë. Spanja ishte në rrugë e tëra”, tha Berisha.
Ish-kryeministri u shpreh se është një anëtar i Komisionit të Rithemelimit, ndërsa shtoi se as ai vetë dhe as Komisioni nuk kanë asnjë autoritet mbi vendimet e Kuvendit të 11 dhjetorit.
“Ajo kryesi është e shkarkuar nga 4900 delegatë, nuk ekziston, por unë nuk mund të them dhe nuk thashë që ai nuk është kryetar i grupit parlamentar. Jam për një parti më të bashkuar dhe më të hapur. S’ka pazare në një familje politike dhe s’mund të ketë.”-tha Berisha.
Ndër të tjera lideri historik i PD deklaroi se në këtë parti ka individë, grupe me mendime të ndryshme të cilat ai uron që të punojnë së bashku për të rrafshuar çdo paqartësi.
“Ka raport që është tipik për çdo forcë demokratike në botë. Raporti shumicë pakicë”, tha Berisha.
