Një fillim të tillë ndoshta nuk e priste as vete Giresse. Trajneri francez nuk e fshehu gëzimin për fitoren e thellë 5-0 me Burkina Fason teksa ai vuri theksin te paraqitja shumë e mirë por edhe atë që bënë lojtarët në mënyrë individuale sidomos ata debutues.
“Është shumë e rëndësishme të debutosh me fitore dhe pa dyshim cilësia e treguar nga futbollistët, golat më bëjnë të lumtur. Siç e kam thënë më parë, kam tentuar t’i jap mundësinë gjithsecilit. Ndaj Zvicrës do të aktivizoj të tjerët, me synimin për t’ua dhënë të gjithëve mundësinë. Pa dyshim një fitore më shumë rëndësi, aq me tepër në “Fadil Vokrri”, pasi ish-presidentin e njihja personalisht.
“Është edhe një fitore simbolike edhe për të. Jam shumë i kanaqur me lojtarët debutues, sidomos për Dellovën, sepse vjen nga kampionati i Kosovës, i kemi dhënë mundësi për të luajtur. Do të jetë motiv për lojtarët që luajnë në ligën e Kosovës. Komunikimin e bëjmë në frëngjisht, sepse ka lojtarë që dinë frëngjisht, pak anglisht, gjithashtu pak spanjisht. Pastaj, për të kryer një zëvendësim mjaftojnë gjestet”, u shpreh në fjalën e tij trajneri francez që e nisi në mënyrën më të mirë aventurën me dardanët.
