Një grup burrash shqiptarë rrëmbyen, mbajtën të burgosur dhe përdhunuan një grua që kishte kaluar natën e saj të parë jashtë, pas përfundimit të kufizimeve për Covid.
Vullnet Haka, 33 vjeç dhe Ibrahim Bezati, 36 vjeç, të dy nga Bedford, akuzohen për mbajtje peng dhe katër akuza për përdhunim ndaj viktimës 23-vjeçare.
Gemti Hyka, 31 vjeç, përballet me të njëjtat akuza si dhe rrëmbim.
Gjykata e Luton Crown dëgjoi dje se gruaja kishte qenë në një natë jashtë me shoqen e saj, kur ata u ndanë, ndërsa po largoheshin nga klubi i natës Vogue në qendër të Bedfordit, në orët e para të 4 shtatorit të vitit të kaluar.
Mikja e gruas i tha jurisë se ajo eci djathtas dhe viktima shkoi majtas për të shmangur një grup burrash që ziheshin në rrugë jashtë. Por më pas dyshja humbën njëri-tjetrin dhe shoqja e gruas, gjithashtu 23 vjeçe, kaloi gjysmë ore në kërkim të saj. .
Më në fund rreth orës 7.30 të mëngjesit shoqja tha se mori një telefonatë nga gruaja, e cila ishte duke qarë.
Ajo i tha shoqes se ishte në stacionin e policisë në Kempston dhe tha: “Kam nevojë për mamin”.
Dyshohet se ajo është rrëmbyer nga i pandehuri Hyka dhe është dërguar në një pronë ku është mbajtur e burgosur dhe dhunuar nga Hyka, Haka dhe Bezati.
Sipas Daily Mail, shqiptarët e arrestuar kanë mohuar akuzat.
E pranishme në gjykatë ishte edhe 23-vjeçarja, e cila në dëshminë e saj ka deklaruar: “U luta që të më linin të shkoja. Isha e hutuar dhe e frikësuar”.
Gruaja tha se nuk do të pranonte kurrë të largohej me dikë që nuk e njihte dhe tha se nuk pranonte të bënte seks me askënd apo aktivitet seksual me askënd.
