Zëvendësambasadori i Rusisë në OKB, Dmitry Polyansky, ka thënë se Rusia ka të drejtën për të përdorur armë bërthamore nëse NATO-ja “provokon” vendin.
Në një intervistë për “Sky News”, i pyetur për perspektivën e një lufte bërthamore kundër pjesës tjetër të botës, Polyansky tha: “Nëse Rusia provokohet nga NATO, nëse Rusia sulmohet nga NATO, atëherë pse jo, ne jemi një shtet bërthamor”.
“Unë nuk mendoj se është e drejtë të flasim për këtë. Por ju nuk duhet të kërcënoni Rusinë dhe të përpiqeni të ndërhyni. Sepse kur keni të bëni me një shtet bërthamor, sigurisht, duhet të llogaritni të gjitha pasojat e mundshme të sjelljes suaj”, tha ai.
Zëvendësambasadori hodhi poshtë një deklaratë zyrtare të qeverisë amerikane se ushtarakët rusë ishin fajtorë për krime lufte në Ukrainë.
“Unë nuk mendoj se ne po kryejmë krime lufte në Ukrainë. Sigurisht, nuk më takon mua të gjykoj. Unë nuk jam atje. Dhe ju nuk jeni atje. Ju shikoni shumë video që mund të jenë false. Ju besoni në një gjë, unë besoj në një tjetër”, deklaroi Polyansky.
Më herët, Kremlin deklaroi se Rusia do të përdorë armë bërthamore në rast të kërcënimit të ekzistencës së saj.
