Deputeti Belind Këlliçi u shpreh pasditen e sotme në “FRPD Talk” ku ishin të pranishëm edhe drejtuesit kryesorë të të rinjve republikanë amerikanë, foli për krijimin e një modeli të ri politik, ku të rinjtë të kenë një rol të fortë në politikën shqiptare, veçanërisht në atë që e quajti si konservatorizmin shqiptar.
Këlliçi tha se deri më tani të rinjtë i kemi parë të angazhuar në mënyrë vullnetare në fushata zgjedhore, apo edhe në parti të ndryshme, por kurrë nuk kanë prekur pushtetin me dorë.
“Ne duhet të krijojmë një model të ri, një model që të rinjtë të marrin në dorë fatet e vendit. E majta në Shqipëri ka krijuar modelin e anti-vlerave, duke promovuar njerëz që kanë probleme me ligjin”, tha Këlliçi. Në vijim ai shtoi se ne duhet të marrim modelet më të mira të organizimit, përfshi këtu edhe ato të republikanëve amerikanë, që përfaqësojnë vlerat e konservatorizmit.
Deputeti demokrat tha se është koha për të hapur një kapitull të ri për të promovuar meritokracinë, kontributin dhe vlerat e mirënjohjes.
“Duhet të hapim sot një kapitull të ri të promovimit meritokracisë brenda PD, kontributit, vlerave dhe mirënjohjes brenda kësaj partie. Kemi sot dy modele të shumë të rinjve, që është Oerd Bylykbashi dhe Ivi Kaso. Dy modele që duhen marrë si shembull. Jo modelet e së majtës në Shqipëri”, tha Këlliçi.
Sipas tij, Partia Demokratike duhet t’i rikthehet boshtit të saj ideologjik dhe këtë nuk mund ta bëjë më mirë se në partenritet të plotë me homologët dhe të rinjtë e Partisë Republikane në Shtetet e Bashkuara të Amerikës.
“Kam patur fatin të takoj kryetarin e të rinjve republikanë në SHBA, Rick Loughery. Priti me shumë kënaqësi ftesën time që të vinte në Tiranë”, tha Këlliçi.
