Zbardhet dinamika e ngjarjes së ndodhur mbrëmjen e djeshme në Shkodër, ku u shënuan të shtëna me armë zjarri. Nga shkëmbimi i zjarrit mes dy personave nuk u shënuan persona të lënduar. Autorët, Armando Ndreu dhe Sadet Sala janë ende në kërkim policor.
Dinamika
Dy të rinjtë Armando Ndreu dhe Sadet Sala kanë qenë duke pirë së bashku në një lokal. Në pije e sipër kanë debatuar me njëri-tjetrin dhe janë konfliktuar. Sadet Sala, pronar i një furre buke në vendin ku pati të shtëna, ka goditur me grusht 32-vjeçarin. Ky i fundit ka shkuar në shtëpinë e tij që ndodhet në katin e 7-të të një pallati aty afër duke marrë një automatik kallashnikov, është rikthyer duke qëlluar në drejtim të Sadet Salës. Ky i fundit ka arritur që t’i shpëtojë plumbave. Teksa Armando Ndreu ka marrë mjetin e tij për t’u larguar, dyshohet se pronari i furrës së bukës Sala ka qëlluar edhe ai me një pistoletë disa herë. 32-vjeçari i ka shpëtuar plumbave.
Nga të shtënat, një plumb përfundoi brenda furrës së bukës në të cilën ndodhej shitësja. Një plumb kapi edhe një mjet të parkuar në anë të rrugës. Dyshohet se 32-vjeçari Ndreu ka qenë në gjendje të dehur kur ka qëlluar. Nga të shtënat nuk është raportuar për asnjë të plagosur, por vetëm dëme material.
Autorët në kërkim
Pas marrjes së njoftimit për ngjarjen, policia ka mbërritur aty duke nisur hetimet paraprake. Efektivët kanë identifikuar autorin e dyshuar shtetasin, Armando Ndreu 32 vjeç, banues në lagjen Skenderbeg dhe pronarin e furrës së bukës, shtetasin Sadet Sala. Policia po vijon hetimet për zbardhjen e plotë të ngjarjes ndërsa të dy personat e përfshirë në këtë ngjarje janë shpallur në kërkim dhe po punohet për gjetjen dhe kapjen e tyre. Ky shkëmbim zjarri ka frikësuar banorët dhe punonjësit e subjekteve të tjera aty pranë.
