Deputeti demokrat, Ervin Salianji, deklaroi në emisionin ‘Opinion’ se caktimi i zgjedhjeve për kryetarin e PD pas zgjedhjeve lokale, është një kohë shumë e gjatë.
Salianji deklaroi se ka një krizë besimi në Partinë Demokratike ndërsa shtoi se palët duhet të negociojnë.
Ndër të tjera Salianji tha se nëse Basha do rikandidojë për kryetar të selisë blu, PD shkatërrohet.
“Duhet të ketë një grup negociimi me pjesën e të dyja palëve, me pjesën tjetër të PD për të bërë të mundur bashkimin. Pjesa e Komisionit të Rithemelimit të tërhiqet nga presioni që Prilli është afat fundor dhe ne do kemi Kuvendin.
Të lihen mundësi negociimi dhe të gjendet pika të përbashkëta. Kjo çon në një bashkim. Sot ka zyrtarisht një Parti Demokratike të Shqipërisë.
Duhet të ketë një bashkim të palëve. Nëse një nga palët nuk tërhiqet, PD në zgjedhjet e tjera nuk do jetë as konkurruese e jo më të fitojë.
Të ketë një garë të plotë në PD. Që të shërohet PD kërkuam dorëheqjen e Bashës. Nëse Basha rikandidon, të vazhdojnë ta shkatërrojnë PD-në”, tha Salianji.
