Lulzim Basha ka thirrur sot një mbledhje të Grupit Parlaentar, Kryesisë dhe Kolegjit të Kryetarëve, ndërsa në fakt pritej prej tij dorëheqja, ashtu sikundër ia kanë kërkuar deputetët pas rezultatit katastrofik të 6 marsit në zgjedhjet e pjesshme vendore.
E ndërsa grupi parlamentar është shfaqur kundër tij duke i kërkuar dorëheqjen, Kolegji i Kryetarëve i ka shprehur mbështetjen, dhe po kështu edhe një pjesë e anëtarëve të Kryesisë, çka duket se Lulzim Basha mbledhjen e sotme do e përdorë pvr të vënë përballë njëri-tjetrit grupin që e mbështet me ata që e kundërshtojnë.
Duket se kjo skemë është kuptuar nga ligjvënësit, të cilët nga burime jo zyrtare mësohet se mund të bojkotojnë mbledhjen e thirrur nga Basha. Mësohet se në këtë mbledhje të mungojnë pjesa më e madhe e deputetëve, që janë shfaqur së fundmi edhe kritikët më të ashpër të Bashës.
Takimi i zgjeruar i tre strukturave pritet të nisë në orën 17:00 në selinë e PD dhe nuk dihet pse Basha nuk ka mbledhur Këshillin Kombëtar, pjesën më të madhe të të cilit i ka të emëruarit e tij, ashtu sikundër kryetarët në degë apo anëtarët e kryesisë.
Grupi parlamentar, në shumicë dërrmuese kanë mbajtur qëndrime të forta kundër Lulzim Bashës, pas zgjedhjeve të 6 marsit, ku kandidatët e tij u renditën të tretët, disfatë e cila i ndodhte PD-së për herë të parë në 31 vite, që prej themelimit.
