Në familjen e Bafjar Nexhës në Karbunarë të Lushnjes, varfëria është ulur këmbëkryq. Mjerimi është bashkuar me errësirën, pasi siç thotë kryefamiljari, energjia u është ndërprerë prej 6 vitesh në pamundësi për ta paguar.
Çifti i bashkëshortëve sëbashku me tre fëmijët jetojnë pa asnjë të ardhur, pasi edhe ndihma ekonomike u është ndërprerë prej më shumë se tre vitesh.
“BOOM” u interesua pranë Bashkisë së Lushnjes, e cila tha se do të verifikojë rastin dhe në vijim do të kthejë përgjigje.
Gazetarja: Sa fëmijë keni?
Baftjar Nexha: Tre, dy vajza dhe një çun. Jetojmë në këto kushte siç i shihni. Ndihmë ekonomike kam marrë përpara, jo më. Jam ankuar në Bashki, nuk e marrim përsipër thonë.Pension nuk marr. Jetojmë këtu që në ’75, ishin pleqtë gjallë.Mbijetojmë në kushte të mjerueshme, me ndihmë nga të tjerët. Na ndihmon fshati, kush ndonjë perime dhe kush ndonjë thes miell, kush vaj.Po bëj 6 vjet pa drita. Fatura kishte raste që vinte 30, kishte raste 40, 50. Me qirinj si në mesjetë.Kam shkuar atje, kontribute thotë, ku ti gjej unë kontributet? Vetëm mjerim, vetëm vuajtje, asgjë tjetër.Nuk kam çfarë bëj fare.Më janë prerë krahët.
Gruaja tregon fundin e thesit të miellit.
Gazetarja: Kaq keni?
Gruaja: Kaq. Me kismet, Zoti lart e di.Dita ime nis me hallet e fëmijës se ça do u jap kur ngrihen në mëngjes, nuk kam tu jap.
“BOOM” në Bashkinë e Lushnjes
Punonjësi 1: Kur pretendon se të është ndërprerë ndihma?
Denoncuesja: Kam tre vjet e gjysëm që është prerë.
Punonjësi 1: Me çfarë arsyeje?
Denoncuesja: Që nuk ka para, nuk ka të ardhura.
Punonjësi 1: Ky nuk është argument, ua dha me shkrim?
Denoncuesja: Kështu më thanë.
Punonjësi 2: Do bëjmë një informacion, do mbledh një grup verifikimi, vemë fotografojmë dhe japim një informacion me shkrim.
Punonjësi 1: Do bëjmë një kërkesë sot këtu, do i vendosim numër protokolli dhe do marrë përgjigje pastaj, do i shikojmë të gjitha.
Gazetarja e “BOOM” e ndoqi këtë familje deri në mbrëmje, për të parë sesi ndriçohet me qiri.
Baftjar Nexha: Do hamë darkën dhe do flemë gjumë.
Gazetarja: Si ja bën për të mësuar?
Djali: Duke i marrë nga shokët ose nuk i bëj fare. Mësuesja më bërtet, më gjykon por nuk kam çfarë të bëj dhe unë.
