Nxirret edhe trupi i dytë i pajetë i minatorit Afrim Zhutaj, 40 vjeç, i cili humbi jetën si pasojë e shembjes së galerisë në minierën e fshatit Lajthizë në Tropojë.
“Në vijim të informacionit të dhënë më parë, në lidhje me shembjen e galerisë në fshatin Lajthizë, ku humbi jetën shtetasi A.D, 41 vjeç dhe mbeti i bllokuar në brendësi të galerisë shtetasi A.ZH, ju informojmë se:
Nga grupi i Avari-Shpëtimit të Minierave, punonjësit e Policisë dhe minatorët, u bë e mundur nxjerrja e trupit të pajetë të shtetasit A. Zh., 40 vjeç, banues në Kepenek, Tropojë.
Grupi hetimor nën drejtimin e Prokurorisë së Rrethit Gjyqësor Tropojë po vijon hetimet për zbardhjen e shkaqeve të kësaj ngjarje”, njoftoi policia mëngjesin e sotëm.
Ngjarja e rëndë ndodhi një ditë më parë ku si pasojë e shembjes së galerisë mbetën të bllokuar në minierë shtetasit
Adil Dautaj dhe Afrim Zhutaj.
“Më datë 19.03.2022, rreth orës 11:55, në fshatin Lajthizë është shembur një galeri, ku për pasojë ka humbur jetën një shtetas A. D., 41 vjeç, banues në Tropojë dhe dyshohet se brenda saj janë bllokuar dhe dy punonjës.
Grupi hetimore dhe ambulaca ndodhen në vendin e ngjarjes, për t’ju ardhur në ndihmë personave të bllokuar”, njoftonte policia. Trupi i pajetë i minatorit Adil Dautaj u nxorr mbrëmjen e djeshme nga galeria.
.
