Është nxjerrë i pajetë edhe trupi i minatorit të dytë që mbeti i bllokuar pas shembjes së galerisë së kromit në Tropojë.
Afrim Zhutaj nga Kepeneku 43 vjeç, është nxjerrë i vdekur nga galeria.
Adil Dautaj po ashtu humbi jetën.
Galeria në fshatin Lajthizë – Njësia administrative Bytyq, u shemb rreth orës 11:55. Disa minatorë mbetën të bllokuar. Raportohet se ekipet e shpëtimit nxorën 4 minatorë të gjallë, ndërsa dy prej tyre u nxorën të pajetë. Trupat e pajetë të dy minatorëve janë nxjerrë nga galeria e shembur, pas disa orësh kërkimesh nga ekipet e kërkim-shpëtimit. Shembja e galerisë ka ndodhur në mbi 1000 metra thellësi.
“Në vijim të informacionit të dhënë më parë, në lidhje me shembjen e galerisë në fshatin Lajthizë, ku humbi jetën shtetasi Adil Dautaj, 41 vjeç dhe mbeti i bllokuar në brendësi të galerisë shtetasi Afrim Zhutaj, ju informojmë se: Nga grupi i Avari-Shpëtimit të Minierave, punonjësit e Policisë dhe minatorët, u bë e mundur nxjerrja e trupit të pajetë të shtetasit Afrim Zhutaj, 40 vjeç, banues në Kepenek, Tropojë. Grupi hetimor nën drejtimin e Prokurorisë së Rrethit Gjyqësor Tropojë po vijon hetimet për zbardhjen e shkaqeve të kësaj ngjarje”, njoftoi policia.
