Ish-Kryeministri Sali Berisha u shpreh pasditen e sotme në Syri Tv se i pari që solli çështjen e TAP në Shqipëri në vitin 2006 ishte Naskë Afezolli, një ish-zv.ministër në Qeverinë Meksi në vitet 1994-1996.
Berisha tha se e ka vlerësuar që në fillim idenë, duke shtuar se aq sa ishte i interesuar për Shqipërinë, isha i interesuar edhe për Europën Perëndimore.
“Rusia kërkonte të kapte korridorin e jugut dhe unë kam bërë çmos, me rolin që më takonte, që kjo të mos ndodhte”, tha Berisha.
Ai pohoi se kurorëzimi i gazsjellësit TAP ishte një proces i vështirë.
Berisha vlerësoi rolin e presidentit të Azerbajxhanit, Ilham Aliev në realizimin e projektit të gazsjellësit TAP, për të dërguar gaz në Europën Perëndimore.
“Ka qenë shumë e vështirë, sepse gazi më shumë se çdo materie tjetër është politikë. Politika dhe gazi janë të lidhura. Kurorëzimi i këtij gazsjellësi i cili përjashtonte gazin rus dhe ‘digjet’ projektin e South Stream, korridorit jugor të gazit të parashikuar nga Rusia. Përjashtimi i këtij projekti ishte fillimisht në kufijtë e të pamundurës, sepse Rusia dhe jo vetëm, lobimi i gazit rus shumë i fuqishëm në Turqi, Greqi, Itali, kishin projektin e tyre.
E dyta, siç ma kishte thënë Aliev, gazin azer donin ta blinin të gjithin Rusia, Irani dhe Turqia. Turqia kishte vendosur instalimet për gazin në të gjithë territorin e saj, duke mos patur gazin që i duhej. Rusia kishte arritur të pushtonte me korridorin e veriut të dominojë me Nord Stream 2 dhe gazsjellësit ekzistues, donte të kapte South Stream, korridorin e jugut. Në këtë mes kishte një njeri vizionar, ishte Aliev i cili donte që gazi i tij të vinte në Europën Perëndimore, në mënyrë që vendi i tij të ishte i lidhur me vendet e Europës. Në këtë kontekst, në 8 vite, NATO dhe TAP, kanë qenë çështjet më themelore të agjendës time për Shqipërinë, natyrisht edhe pavarësia e Kosovës, në të gjitha takimet me ndërkombëtarët.
Aq sa isha i interesuar për interesin e Shqipërisë, po kaq edhe për interesin Europian. E quaja jetike që korridorin e jugut të mos e kishte Rusia, edhe për ato që rusët kanë bërë ndaj nesh. Pra, për të mundur, për të bërë gjithçka ndaj tyre, ndaj një kancelarie që ndër shekuj kanë bërë shumë gjëra të këqija për shqiptarët.
Nga të parët që nxorën pengesa ishte Turqia dhe në Zvicër takova Presidentin Erdogan. I thashë që po pengon projektin, ndërkohë që Turqia nuk humbet asgjë”, tha Berisha.
Në vijim, ish-Kryeministri ka rrëfyer detaje nga takimi me Hillary Clinton, ku sërisht ka diskutuar lidhur me TAP.
