Të tjera detaje janë publikuar nga mediat italiane lidhur me operacionin policor që çoi në arrestimin e disa anëtarëve të një grupi të strukturuar kriminal në Itali, ku bënte pjesë edhe këngëtarja e njohur shqiptare, Elsa Lila.
Hetimet kanë zbuluar se Lila kishte një rol aktiv në organizatën kriminale, ndërsa mbante llogaritë e grupit.
Sipas mediave italiane, në një përgjim të autoriteteve italiane, këngëtarja bisedon me një anëtar të grupit që e strehon në banesën e saj pasi atje është i sigurt dhe nuk preket nga policia.
“Unë nuk kam frikë nga shteti, kam frikë nga hajdutët… mua nuk më vjen askush nga shteti të më kontrollojë, unë tek shteti shkoj çdo ditë”.
Gjithashtu nga përgjimet ka rezultuar se këngëtarja shqiptare këshillonte anëtarët e tjerë të grupit që të siguronin lidhje me njerëz me pushtet për të garantuar paprekshmërinë.
“Këtu është si në Shqipëri, të duhet një i njohur, kushdo që të jetë në qeveri të duhet të gjesh një mënyrë sepse edhe këtu njerëzit shiten”.
Këngëtarja shqiptare Elsa Lila u arrestua një ditë më parë në Itali, si pjesë e një rrjeti të trafikimit të drogës. Në pranga u vunë edhe 7 persona të tjerë, mes të cilëve dhe boksieri Petrit Bardhi, ndërsa katër janë shpallur në kërkim.
