Kompania serbe e fluturimeve “Air Serbia” ka njoftuar se do të ulë në tetë numrin e fluturimeve Beograd – Moskë dhe anasjelltas, aq sa ishte para se të shpërthente lufta në Ukrainë, ka njoftuar portali i pavarur serb “N1” të mërkurën.
Pas sanksioneve ndaj Rusisë, kompanive të këtij vendi iu ndalua fluturimi mbi qiellin e shumicës së shteteve evropiane. Dhe, “Air Serbia” shfrytëzoi rastin e mori edhe linjat e kompanisë rusë “Aeroflot”, duke e çuar në 15 numrin e fluturimeve Beograd – Moskë dhe anasjelltas brenda javës.
Por kjo nxiti reagime të mëdha, sidomos të mediave perëndimore që bënë presion të vazhdueshëm. Më herët gjatë ditës, edhe presidenti i Serbisë, Aleksandar Vuçiq, ka bërë të ditur për uljen e numrit të fluturimeve me Moskën në tetë, aq sa ishte para se të niste lufta në Ukrainë.
Sipas mediave në Serbi, biletë për Moskë ose Beograd nuk mund të sigurohet gjatë muajit mars për shkak të kërkesës së madhe. Po ashtu për një moment gjatë kësaj jave një biletë njëdrejtimëshe është shitur për rreth 1.200 euro.
Shumë rusë kanë shfrytëzuar këtë linjë për të ikur nga Rusia. Sipas mediave, nga Beogradi ata po ikin në vende të tjera evropiane.
Serbia është vendi i vetëm evropian, përjashto Bjellorusinë si aleate të Rusisë, që ka refuzuar t’i vë sanksione Moskës zyrtare për agresionin mbi Ukrainën të nisur më 24 shkurt.
