Kryetarja e Gjykatës së Lartë të Republikës së Maqedonisë së Veriut, Besa Ademi, në kuadrin e një vizite zyrtare në Tiranë, është takuar me zv.kryetarin e Gjykatës së Lartë, Sokol Sadushi.
Ademi, ka vizituar Gjykatën e Lartë në kuadër të një takimi dypalësh mes dy gjykatave, ku është diskutuar në lidhje me rolin e rëndësishëm të Gjykatës së Lartë në sistemin gjyqësor, duke vleresuar për më tepër bashkëpunimin dhe shkëmbimin e eksperiencave, ndërmjet Maqedonisë së Veriut dhe Shqipërisë, duke vënë në plan të parë problemet e përbashkëta, si vende të cilat synojnë antarësimin e tyre në Bashkimin Evropian.
Sadushi, u shpreh se të dyja vendet i njohin problemet dhe sfidat e përbashkëta, më të cilat përballen për të ardhmen e tyre, duke theksuar se ky takim do të shërbejë për shkëmbimin e mendimeve rreth arritjeve dhe objektivave të synuara.
Sipas dy drejtuesve të Gjykatave të Larta, sistemet gjyqësore kanë problematika të ngjashme si vende fqinje.
Bashkëpunimi duhet të jetë sa më konkret në mënyrë që të arrihen qëllimet e caktuara, veçanërisht në mirëfunksionimin e institucioneve, adoptimin e standardeve evropiane për një drejtësi e cila synon të ndryshojë perceptimin që publiku ka mbi gjyqësorin.
