Deputeti demokrat Belind Këlliçi u shpreh në emisionin ‘A Show’ në Syri Tv se beteja e ish-kryeministrit Sali Berisha është vetëm për votën e lirë.
Këlliçi tha se Basha ka polarizuar situatën dhe ju ka shpëlarë trurin të vetëve, ndërsa shtoi se Basha ka kërcënuar deputetët gjatë mbledhjes së grupit parlamentar dy ditë më parë.
“Kërcënoi të hënën grupin parlamentar duke thënë ‘ose iki unë ose vjen Sali Berisha’. Kush do shkonte në PD? Gogoli? Ai që për 13 vite mbajti PD-në në pushtet? Ky është terror psikologjik ndaj bashkëpunëtorëve të tij”, tha Këlliçi.
Ai tha se Basha i ka bërë dëmin më të madh opozitarizmit, PD-së dhe i ka dhënë oksigjen regjimit të Edi Ramës. Deputeti demokrat tha se habitet se përse Basha nuk e kupton që sa më shumë qëndron po shkatërron veten e tij.
“I kam dedikuar mbi një dekakdë këtij individi. Ai është peng, prap njeriu, qenia njerëzore e ruan dinjitetin. Kjo që ka ndodhur me atë individ nga ana psikologjike është e paimagjinueshme. Lëre mënjanë PD-në, por vetes tënde, ai është i ri, të kthehet në memen kryesore në rrjete sociale. Të mos kuptosh realitetin është shumë e rëndë”, tha Këlliçi.
Ai deklaroi se nuk e ka pasur të lehtë për tu bashkuar me grupin e Rithemelimit pasi është bombarduar me lajme të rreme nga selia blu.
“Jam bombarduar me fake news nga selia sikur do vinin trupat amerikane, do mësynin në selinë e partisë, do mësynin kundër Berishës, sikur do shpalleshim non grata të gjithë ne që e mbështesnim, anulime vizash, arrestime imagjinare, përralla me mbret. Më ka mjaftuar eksperienca e ngritur dhe marrëdhënia e ngritur me vite me selinë diplomatike amerikane”, tha Këlliçi.
Ndër të tjera ai tregoi se i është dashur të analizojë për disa ditë dhe t’i rikthehet bisedave në vite për të kuptuar se çfarë dëgjon brenda partisë ishin fake news.
“Ishin një lojë e pisët për të mashtruar deputetët, dhe për të penguar Berishën me lëvizjen Foltore. Ishte një shok i jashtëzakonshëm”, tha Këlliçi.
