Pak ditë më parë ish sulmuesi dhe trajneri Andriy Shevchenko deklaroi se nuk mund të mendojë më për futboll në këto momente dramatike për vendin e tij.
Familja e Shevchenkos ndodhet në Kiev dhe nuk pranon të largohet teksa ish sulmuesi legjendar i Milanit ka ndërmarrë iniciativa për të ndihmuar vendin e tij.
E fundit është ajo që ka të bëjë strehimin e disa fëmijëve refugjatë ukrainas në shtëpinë e tij në Londër. Përveç kësaj, ish trajneri i Genovas po ndihmon për të sjellë edhe 150 fëmijë të tjerë në Britaninë e Madhe, mes atyre që ikin nga pushtimi rus i Ukrainës.
Qeveria e Mbretërisë së Bashkuar ka nisur programin “Shtëpi për Ukrainën”, duke shpresuar të lejojë dhjetëra mijëra njerëz që ikin nga lufta në Ukrainë të strehohen në këtë vend. Që nga mëngjesi i së martës, gati 89,000 njerëz kanë shfaqur interes për të hapur shtëpitë e tyre për ata që ikin nga konflikti.
Duke folur për këtë iniciativë të Mbretërisë së Bashkuar, Shevchenko falenderoi shumë qeverinë dhe ata qytetarë që kanë vendosur të pranojnë familje nga Ukraina.
“Lufta është shumë mizore dhe është e vështirë të shohësh qytete të shkatërruara, njerëz që vdesin. Unë jam baba i katër fëmijëve dhe të shoh fotot e fëmijëve që vdesin, bombat që godasin spitalet e fëmijëve, nuk mund t’i përballoj dot. Unë nuk mendoj se asnjë person në botë mund ta duroj dhe të përballoj diçka të tillë. Mundohem të mbështes vendin tim, përpiqem të tërheq vëmendjen, jam përpjekur të flas saktësisht për atë që po ndodh, përpiqem të prek zemrat e njerëzve dhe më pas të kuptoj rrethanat”, u shpreh i prekur ish sulmuesi i Milan dhe Chelsea vite më parë.
