Petrit Vasili, nënkryetar i LSI, e cilëson si mjaft shqetësuese praninë e policëve civilë në protestat qytetare dhe dhunën e përdorur ndaj qytetarëve paqësorë, që kanë reaguar lidhur me rritjen e madhe të çmimeve.
Vasili tha se është krejt e papranueshme dhe e jashtëligjshme që policë civile të armatosur dhe me kapuça dhunojnë e arrestojnë qytetarë.
“Është konstatuar përdorimi i civilëve të paidentifikuar. Pamjet janë mizerable. Qeveria do vazhdojë ta përdorë këtë llojë paligjshmërie për të intimiduar dhe për të krijuar psikozën që këta horra mund të vijnë orar pa orar.”-tha Vasili.
Vasili tha se i është drejtuar Prokurorisë në lidhje me rastet e dhunshme. Nënkryetari i LSI tha se shteti ka fytyrë dhe fytyra e tij është uniforma e cila aktualisht ka marrë pamjen e horrave.
“Secili polic ka numër identifikimi. Secili di me kë ka të bëjë. Shteti s’ka pse fshihet dhe të marrë pamjet e gangsterëve dhe horrave. Këta maskarenj kanë rrëmbyer plot njerëz. Shqetësim madhor për integritetin dhe mënyrën si funksionon dhe dhunohet ligji. E tmershme të dëgjosh nga drejtorë policie, që ju thotë horrave kujdes se ka kamera”, tha Vasili në një reagim për Syri Tv.
Nënkryetari i LSI tha se Edi Rama dhe PS duan të shfuqizojnë protestën. Sakaq, Vasili theksoi se Rama është instrument i oligarkëve.
“Sa të jenë këta do ketë horra policie që të rrahin. Një vend që s’bën përpara dhe ka vetëm fukarallëk. Objektivat të çohen deri në fund dhe qytetarët të kuptojnë se protestat e dërrmojnë një qeveri. Rama është instrument i oligarkëve.”-tha Vasili.
