“Kush mbjell uri, do korrë revoltë”, shkruhet në banderolën më të madhe që mbajnë në duar një grup studentësh që iu bashkuan protestës qytetare që po zhvillohet para Kryeministrisë kundër rritjes së çmimeve.
Gjithashtu disa nga protestuesit kanë mbajtur flamujt e Ukrainës, që duket se është përgjigjia qytetare ndaj akuzave të Kryeministrit Edi Rama, i cili një ditë më parë tha se “protesta në këto kushte i shërben Putinit”.
“Po nuk ranë çmimet, do bjerë qeveria”, janë thirrjet e vazhdueshme të studentëve, që ndodhen në bulevardin “Dëshmorët e Kombit”.
Sipas tyre, kjo nuk është një protestë politike, por me kërkesa ekonomike. “Rritja e çmimeve godet studentët, dhe mendojeni që shumica e studentëve jetojnë me të ardhura nga prindërit”, tha një prej studentëve, që shtoi se “duhet një paketë ndihmash edhe për studentët”.
“Nëse rriten çmimet, duhet të rriten edhe pagat minimale. Qiratë janë të papërballueshme, ndërsa konviktet janë me kushte mesjetare. Çmimet kanë njohur rritje të papërballueshme, merreni me mend që një shishe me vaj po shitet 410 lekë për litër”, tha një tjetër studente.
