Deputeti demokrat Edmond Spaho shprehet se Lulzim Basha ka zhvilluar sot komedinë e radhës me kolegjin e kryetarëve të emëruar. Spaho iu thotë deputetëve që ende janë pranë Bashës që t’i japin fund kësaj farse duke u ndarë nga Brava dhe duke u bashkuar me shumicën.
“Sot Lulzim Brava zhvilloi komedinë e rradhës me kolegjin e kryetarëve të emëruar. Komedia shkoi sipas parashikimit. Brava nuk duhet të dorëhiqet, jemi në këtë gjendje për shkak të 9 Shtatorit, të ikë edhe Berisha. Asgje e re, çdo gjë me skemë për të mbajtur Bravën në seli.
Kolegë deputetë që vazhdoni të jeni në një grup me Bravën, nëse vërtetë ju shqetëson gjendja në të cilën ndodhet PD, nëse vërtetë mendoni se bashkimi është domosdoshmëri për të qenë të suksesshëm, jepini fund kësaj farse, ndahuni nga Brava dhe bashkojuni shumicës.
Vota e lirë është themeli i zgjidhjes së problemeve me të cilat përballemi. Boll e ka shkatërruar dhe përçare PD sharlatani dhe palaçua politik Lulzim Brava. Ngrihuni në nivelin e anëtarësisë së PD dhe elektoratit të djathtë dhe ndahuni njëherë e mirë nga ky matrapaz. Koha dhe njerëzit do na gjykojnë të gjithëve.”-thotë Spaho.
Kujtojmë se një ditë më parë Basha mblodhi grupin parlamentar ku për 6 orë me radhë kryetarit të Partisë Demokratike iu kërkua që të largohet nga drejtimi i PD. Ndërsa sot, Lulzim Basha thirri edhe një herë në ndihmë krerët e degëve në rrethe.
Pjesa më e madhe e tyre janë të emëruar ose komanduar nga vetë Lulzim Basha ndaj ata kanë mbajtur një qëndrim kundër deputetëve duke thënë se dorëheqja e Bashës nuk është zgjidhje.
