Qytetarë protestuan sërish këtë të Diel para kryeministrisë, pas rritjes së konsiderueshme të çmimeve në vend ditët e fundit.
Shumica e protestuesve u mblodhën fillimisht te Sheshi Skënderbej dhe pas disa deklaratave dhënë për gazetarët e pranishëm, marshuan drejt sheshit para zyrës së Edi Ramës.
Aty, nga mikrofini i protestës, shprehën shqetësim për rritjen e çmimeve, koston e jetës në Shqipëri si dhe shprehën pamundësi për të ndërtuar një të ardhme dinjitoze. Paketa sociale e prezantuar dje nga kryeministri Edi Rama nuk u mirëprit, por u cilësua e pamjaftueshme.
Qytetarët hodhën akuza e kërkuan largimin e Edi Ramës nga postimi i drejtuesit të qeverisë, si dhe lajmëruan se protestat nuk do të ndalen. U njoftua se protestat do vijojnë çdo ditë jave nga ora 17:00 dhe të Shtunën në formën e një marshimi si ditën e djeshme dhe sot.
Kjo e sotmja shënoi ditën e pestë radhazi të protestës që zhvillohet para kryeministrisë.
Paraditen e sotme, një protestë-marshimm u zhvillua edhe në Korçë, ku më herët gjatë javës u zhvillua një protestë masive.
Në Kukës, gjithashtu, qytetarët u ngritën në protestë.
Këtë të Diel, gjykatat e Durrësit, Tiranës dhe Lezhës liruan nga qelitë personat e arrestuar me forcë nga policia gjatë protestave të mëparshme, duke caktuar masën e detyrim paraqitjes.
Kryeministri Edi Rama, nga ana tjetër, nuk iu përgjigj pozitivisht kërkesës së protestuesve për heqjen e taksave mbi naftën.
