Thirrjet e deputetëve të Grupit Parlamentar të Partisë Demokratike për bashkimin e të djathtëve dhe largimin e Bashës e të Berishës, ish-deputeti Klevis Balliu i konsideroi të panevojshme në këto momente, ndërsa shprehet qartë që e vetmja rrugë për kthimin e partisë në shinat e duhura është vota.
Në një deklaratë të publikuar në rrjetin social Facebook, Balliu shprehet se vetëm përmes votës së demokratëve do të mund të zgjidhet fituesi i kësaj përballje të madhe brenda të djathtës.
Një akuzë e fortë e Balliut është ajo për Lulzim Bashën, për të cilin thotë se qëndron në karrigen e kryetarit dhe mban vulën me urdhër të shefit të tij Edi Rama.
Balliu thotë se ka ardhur koha të zbatohen vendimet e 11 Dhjetorit që rikthen votën si alternativë për bashkimin dhe fuqizimin e opozitarizmit.
Deklarata
Bashkimi i demokratëve vjen vetëm në një mënyrë dhe ajo është vota.
Nuk mund të caktohen garuesit pasi ashtu përcaktohet fituesi.
Metodat majtiste nuk kanë vend në Partinë Demokratike.
Bashkimi nuk mund të vijë duke larguar demokratët por vetëm duke i afruar ata.
Edi Rama ka urdhëruar kunatin e Erion Isufit të mos largohet dhe ai thjesht po zbaton urdhrat e shefit të tij.
Tashmë është koha të zbatohen vendimet e Kuvendit të Partisë Demokratike të mbajtur me 11 Dhjetor që rikthen votën si alternativë për bashkimin dhe fuqizimin e opozitarizmit në Shqipëri.
