Presidenti i Shteteve të Bashkuara të Amerikës njoftoi se SHBA-ja do të ulë në mënyrë drastike statusin e saj tregtar me Rusinë si ndëshkim për pushtimin e Ukrainës dhe gjithashtu do të ndalojë importet e ushqimeve të detit, alkoolit dhe diamanteve ruse, shkruan Alsat.
Në kuadër të masave përfshihet edhe ndalimi i eksportit të mallrave luksoze në Rusi e që përfshin artikuj si duhan, veshje, bizhuteri, makina dhe antike. Këto masa tregtare ndaj Rusisë, Biden tha se po merren në koordinim me Bashkimin Evropian dhe vendet e G7. “Bota e lirë po bashkohet për t’u përballur me Putinin”, tha Biden nga Shtëpia e Bardhë.
Ndryshimet e presidentit Biden në statusin tregtar me Rusinë vijnë pasi presioni dypartiak është rritur në Uashington për të anuluar atë që njihet zyrtarisht si “marrëdhënie e përhershme normale tregtare” me Rusinë. Qëllimi i këtyre masave sipas zyrtarëve amerikanë është që vazhdohet me dëmtimin e oligarkëve rusë duke i privuar ata nga komoditeti pasi SHBA-ja vazhdon përpjekjet e saj për ushtrim të presionit rreth atyre që janë afër presidentit rus, Vladimir Putin.
