Presidenti rus, Vladimir Putin shprehet se Rusia duhet të mirëpresë vullnetarët që duan të luftojnë kundër forcave ukrainase, pak ditë pasi tha se ‘operacionin special’ ua kishte lënë në dorë profesionistëve.
Gjatë një mbledhjeje të Këshillit të Sigurisë në vend, Putin citohet nga Reuters të ketë thënë edhe që ai mbështet planin për t’i dorëzuar rebelëve separatistë në Ukrainë armët që i janë sekuestruar ushtrisë vendase gjatë atij që Rusia e quan “operacion special”.
Sipas ministrit rus të Mbrojtjes, Sergei Shoigu, janë rreth 16 mijë vullnetarë nga Lindja e Mesme që janë gati të luftojnë krah forcave ruse.
Nga ana tjetër, edhe Ukraina u ka bërë thirrje të huajve që duan t’i bashkohen Legjionit Ndërkombëtar, të aplikojnë në ambasadat e Ukrainës në vendet e tyre. Sipas autoriteteve, në këtë legjion kanë mbërritur rreth 20 mijë të huaj, nga 52 shtete të ndryshme të botës.
Edhe ambasadori ukrainas në Tiranë u ka bërë thirrje shqiptarëve t’i bashkohen luftës, por në vendin tonë ligji e ndalon pjesëmarrjen në luftime në vende të huaja.
